2018年11月5日
新生 梁雯稀
因為我係今年新入學既學生，先前都冇接觸過關於泰澤祈禱會既資訊，所以我對於泰澤祈禱會係一無所知既。後來，得知嶺南既一班基督徒計劃去搞一個泰澤祈禱會，抱住去見識下既心態，我就報左名參加。
報左名之後，我非常有幸受到邀請，成為其中一位幫手去帶敬拜既團友。係為泰澤祈禱會練敬拜既時候，透過為泰澤祈禱會擔當司琴的姊妹既介紹，認識左泰澤祈禱會所唱既詩歌。祈禱會的詩歌同我地平時敬拜所唱既詩歌好唔同。詩歌只得三四句，旋律通常好柔美，緩慢。
而去到祈禱會開始既時候，我地就用呢啲詩歌去敬拜神，同平時大家一同讚美神既氣氛唔同，詩歌營造左一個會眾自己安靜既時間。而呢個時間令到會眾可以有一個思想神既空間，拋開忙碌既生活，學業既壓力，單單咁去同神相處。
而過左安靜既時間之後，大家開始為各樣事情代禱。而呢個都係祈禱會難得既地方，除左比會眾有個同神相處既時間之外，亦都比一班基督徒睇到世界同社會既需要，並同心去祈禱，渴望世界係行係合乎神心意的道路中。而代禱環節對於我都有一個提醒，就係要唔好只看重自己既需要，而係要更多去關心社會，令神既愛能夠彰顯係社區。
最後係祈禱會結束之後，大會仲有一個畫畫環節，去將自己想畫既圖案不停重複咁畫係張大畫紙度。而呢張畫紙真係好大，大到可以容納到所有會眾都畫到自己想畫既圖案係張紙度。而呢張大畫紙最後都變成一個好靚既作品。畫紙雖然包含左好多唔同既圖案，但係又莫名奇妙咁融合到。呢啲唔同既圖案代表住每一個唔同既弟兄姊妹，雖然我地個個都唔同，但係當我地一齊合一起來，我地就可以湊成為一幅美麗既圖畫。
參加泰澤祈禱會，令到我拋開固定既敬拜形式，有新既嘗試，當中都有好好既體會，希望能夠有更多機會參與，了解同體驗更多。